यातायात व्यवस्था कार्यालय, बिर्तामोड, झापा प्रदेश सरकार, कोशी प्रदेश अन्तर्गत आन्तरिक मामिला तथा कानून मन्त्रालय मातहत सञ्चालन भइरहेको एक महत्वपूर्ण सेवा प्रदायक प्रशासनिक निकाय हो। यस कार्यालयले झापा जिल्ला लगायत आसपासका जिल्लाका नागरिकहरूलाई सवारी साधन तथा सवारी चालक अनुमति पत्र (लाइसेन्स) सम्बन्धी गुणस्तरीय, सहज, प्रभावकारी र प्रविधिमैत्री सेवा प्रदान गर्नुको साथै कार्यक्षेत्र भित्रको यातायात प्रणालीलाई सुरक्षित, व्यवस्थित, पारदर्शी तथा दिगो बनाउन महत्त्वपूर्ण भूमिका निर्वाह गर्दै आएको छ।

यस कार्यालयका प्रमुख कार्यहरूमा सवारी साधन दर्ता, नवीकरण, स्वामित्व हस्तान्तरण / नामसारी, दर्ता खारेजी, प्राविधिक परीक्षण, राजस्व तथा कर संकलन, अभिलेख व्यवस्थापन, साथै सवारी चालक अनुमति पत्रको अनलाईन आवेदन संकलन, लिखित तथा प्रयोगात्मक परीक्षा सञ्चालन, सवारी चालक अनुमति पत्र वितरण, नवीकरण र अभिलेखीकरण लगायतका सेवाहरू पर्दछन । यी सेवाहरूलाई कानुनसम्मत, छिटोछरितो, पारदर्शी तथा नागरिकमैत्री रूपमा उपलब्ध गराउनु कार्यालयको प्रमुख दायित्व हो।

कार्यालयले सुरक्षित, अनुशासित र व्यवस्थित सडक यातायात प्रणालीको विकासलाई प्राथमिकतामा राख्दै सडक सुरक्षा प्रवर्द्धन, ट्राफिक सचेतना अभिवृद्धि, दुर्घटना न्यूनीकरण तथा सम्बन्धित निकायहरूसँग आवश्यक समन्वय गरी जनचेतनामूलक कार्यक्रम सञ्चालन गर्दै आएको छ। साथै सूचना तथा सञ्चार प्रविधिको अधिकतम उपयोग गरी सेवा प्रवाहलाई थप सरल, पारदर्शी, छरितो र प्रभावकारी बनाउने दिशामा निरन्तर सुधारका लागि प्राथमिकता दिइएको छ।

सुशासन, उत्तरदायित्व, पारदर्शिता, सेवाग्राहीमैत्री व्यवहार तथा कानुनी शासनका सिद्धान्तलाई आत्मसात गर्दै कार्यालयले उच्चस्तरीय सार्वजनिक सेवा प्रवाहमा निरन्तर प्रतिबद्धता व्यक्त गरेको छ। प्रदेश सरकारको नीति, योजना तथा कार्यक्रमसँग समन्वय गरी दिगो, समावेशी र प्रभावकारी यातायात व्यवस्थापनमार्फत कोशी प्रदेशको सामाजिक, आर्थिक तथा पूर्वाधार विकासमा योगदान पुर्याउने कार्यालयको दीर्घकालीन लक्ष्य रहेको छ।

"सुरक्षित सडक, व्यवस्थित यातायात, प्रविधिमैत्री सेवा र सुशासन" भन्ने मूल भावनालाई आत्मसात गर्दै यातायात व्यवस्था कार्यालय, बिर्तामोड, झापाले सेवाग्राहीको विश्वास अभिवृद्धि गर्दै गुणस्तरीय सार्वजनिक सेवा प्रवाहका लागि निरन्तर प्रयासरत रहेको छ।